ದೇಶ

15 ಸಾವಿರ ಮೊಬೈಲ್​ ಗಳನ್ನು ಸಾಗಿಸುತ್ತಿದ್ದ ಟ್ರಕ್ ಹೈಜಾಕ್: 6 ಕೋಟಿ ರೂ. ಮೌಲ್ಯದ ಮೊಬೈಲ್ ಲೂಟಿ ಮಾಡಿದ ದರೋಡೆಕೋರರು

ಚಿತ್ತೂರು,ಆ.27-ಸುಮಾರು 15 ಸಾವಿರ ಮೊಬೈಲ್​ ಫೋನ್​ ಗಳಿದ್ದ ಟ್ರಕ್ ಒಂದನ್ನು ಹೈಜಾಕ್ ಮಾಡಿದ ಹೆದ್ದಾರಿ ದರೋಡೆಕೋರರ ಗುಂಪು ಅದರಲ್ಲಿದ್ದ 6 ಕೋಟಿ ರೂ. ಮೌಲ್ಯದ ಫೋನ್​ಗಳನ್ನು ದೋಚಿ ಪರಾರಿಯಾಗಿರುವ ಘಟನೆ ಆಂಧ್ರಪ್ರದೇಶ-ತಮಿಳುನಾಡು ಗಡಿ ನಗರಿಯಲ್ಲಿ ನಡೆದಿದೆ.

ಟ್ರಕ್​ ಚೆನ್ನೈನ ಶ್ರಿಪೆರಂಬದೂರ್​ನಿಂದ ಮಹಾರಾಷ್ಟ್ರಕ್ಕೆ ತೆರಳುತ್ತಿತ್ತು. ದರೋಡೆಕೋರರು ಶ್ರಿಪೆರಂಬದೂರ್​ನಿಂದ ಟ್ರಕ್​ ಬೆನ್ನಟ್ಟಿ ತಮಿಳುನಾಡು ಗಡಿ ದಾಟಿ ಆಂಧ್ರಪ್ರದೇಶಕ್ಕೆ ಪ್ರವೇಶಿಸುತ್ತಿದ್ದಂತೆ ಟ್ರಕ್​ ತಡೆದಿದ್ದಾರೆ. ಬಳಿಕ ಚಾಲಕನಿಗೆ ಥಳಿಸಿ, ಬಲವಂತವಾಗಿ ಕೆಳಗಿಳಿಸಿ ಹೈಜಾಕ್​ ಮಾಡಿದ್ದಾರೆಂದು ಪೊಲೀಸರು ತಿಳಿಸಿದ್ದಾರೆ.

ಚಾಲಕ ನೀಡಿದ ದೂರಿನ ಅನ್ವಯ ಆಂಧ್ರಪ್ರದೇಶ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ವಿಶೇಷ ಪೊಲೀಸ್​ ತಂಡ ರಚಿಸಿ ಕಾರ್ಯಾಚರಣೆಗೆ ಇಳಿದರು. ಟ್ರಕ್​ ಚೆನ್ನೈ-ತಿರುಪತಿ ಹೆದ್ದಾರಿಯಲ್ಲಿ ಪತ್ತೆಯಾಗಿದೆ. ಮತ್ತೊಂದು ವಾಹನದಲ್ಲಿ ಮೊಬೈಲ್​ಗಳನ್ನು ತುಂಬಿಕೊಂಡು ಟ್ರಕ್​ ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದಾರೆ. ಟ್ರಕ್ ​ನಲ್ಲಿದ್ದ ಅರ್ಧಕ್ಕರ್ಧ ಮೊಬೈಲ್​ಗಳನ್ನು ದರೊಡೆಕೋರರು ಲೂಟಿ ಮಾಡಿದ್ದಾರೆ.

ಟ್ರಕ್​​ನಲ್ಲಿ 12 ಕೋಟಿ ಮೌಲ್ಯದ 15 ಸಾವಿರ ಮೊಬೈಲ್​ ಫೋನ್​ಗಳಿದ್ದವು. ಅದರಲ್ಲಿ ಆರು ಕೋಟಿ ಮೌಲ್ಯದ ಮೊಬೈಲ್​ ಫೋನ್​ಗಳನ್ನು ಲೂಟಿ ಮಾಡಲಾಗಿದೆ ಎಂದು ಪೊಲೀಸ್​ ತನಿಖೆಯಲ್ಲಿ ತಿಳಿದುಬಂದಿದೆ. ಅಂತಾರಾಜ್ಯ ಗ್ಯಾಂಗ್​ನಿಂದ ಈ ಕೃತ್ಯ ನಡೆದಿರುವ ಬಗ್ಗೆ ಪೊಲೀಸರು ಶಂಕೆ ವ್ಯಕ್ತಪಡಿಸಿದ್ದು, ಆರೋಪಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ. (ಏಜೆನ್ಸೀಸ್​, ಎಂ.ಎನ್)

 

 

Leave a Reply

comments

Related Articles

error: