ದೇಶಪ್ರಮುಖ ಸುದ್ದಿ

ಜಮ್ಮು ವಾಯು ನೆಲೆಯಲ್ಲಿ ಡ್ರೋನ್ ದಾಳಿ: ಸಣ್ಣ ಡ್ರೋನ್‌ಗಳ ನಿಯಂತ್ರಣಕ್ಕೆ ತ್ವರಿತ ನೀತಿಗಾಗಿ ಪ್ರಧಾನಿ ಮೋದಿ ನೇತೃತ್ವದಲ್ಲಿ ಸಭೆ

ನವದೆಹಲಿ,ಜೂ.30-ಜಮ್ಮು ವಾಯು ನೆಲೆಯಲ್ಲಿ ಎರಡು ಡ್ರೋನ್ ದಾಳಿಗಳು ನಡೆದು, ವಿವಿಧ ಸ್ಥಳಗಳಲ್ಲಿ ಮತ್ತಷ್ಟು ಡ್ರೋನ್ ಹಾರಾಟ ಪತ್ತೆಯಾದ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ನಿನ್ನೆ ಉನ್ನತ ಮಟ್ಟದ ಸಭೆ ನಡೆದಿದೆ.

ನಾಗರಿಕ ಡ್ರೋನ್‌ಗಳ ಬಳಕೆಯ ನೀತಿಯ ಕುರಿತು, ರಕ್ಷಣಾ ವಲಯದಲ್ಲಿ ಭವಿಷ್ಯದ ಸವಾಲುಗಳು ಮತ್ತು ಇಂತಹ ಬೆದರಿಕೆಗಳನ್ನು ಎದುರಿಸಲು ಆಧುನೀಕ ಉಪಕರಣಗಳನ್ನು ಸೇನೆಗೆ ಒದಗಿಸುವ ಮೂಲಕ ಮಿಲಿಟರಿ ವ್ಯವಸ್ಥೆಯನ್ನು ಬಲಪಡಿಸುವುದು ಮುಂತಾದ ವಿಷಯಗಳನ್ನು ಸಭೆಯಲ್ಲಿ ಚರ್ಚಿಸಲಾಯಿತು.

ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಗೃಹ ಸಚಿವ ಅಮಿತ್ ಶಾ, ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್, ನಾಗರಿಕ ವಿಮಾನಯಾನ ಸಚಿವಾಲಯದ ಅಧಿಕಾರಿಗಳು ಸೇರಿದಂತೆ ವಿವಿಧ ವಿಭಾಗದ ಮುಖ್ಯಸ್ಥರು ಸುಮಾರು ಎರಡು ಗಂಟೆ ನಡೆದ ಈ ಸಭೆಯಲ್ಲಿ ಭಾಗವಹಿಸಿದ್ದರು.

ದೇಶದಲ್ಲಿ ನಾಗರಿಕ ಆಪರೇಟರ್‌ಗಳು ಡ್ರೋನ್‌ಗಳನ್ನು ಬಳಸುವುದರ ಕುರಿತಾದ ಪರಿಣಾಮಕಾರಿ ನೀತಿಯೊಂದನ್ನು ತ್ವರಿತವಾಗಿ ರೂಪಿಸುವ ಸಂಬಂಧ ನಿರ್ಧಾರಗಳನ್ನು ಕೈಗೊಳ್ಳಲಾಯಿತು.

ವಾಣಿಜ್ಯ ಚಟುವಟಿಕೆಗಳಿಗೆ ಸಣ್ಣ ಡ್ರೋನ್‌ಗಳನ್ನು ಬಳಸಲು ನಾಗರಿಕ ವಿಮಾನಯಾನ ಸಚಿವಾಲಯ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿತ್ತು. ಅಂತಿಮ ನೀತಿಯಲ್ಲಿ ನಾಗರಿಕ ಡ್ರೋನ್ ಕಾರ್ಯಾಚರಣೆಗೆ ಮುಕ್ತ ಹಾರಾಟ ಅವಕಾಶ ನೀಡುವುದಕ್ಕೆ ಪೊಲೀಸ್ ಮತ್ತು ಸೇನಾ ಪಡೆಗಳು ವಿರೋಧ ವ್ಯಕ್ತಪಡಿಸಿವೆ.

ಎಷ್ಟು ಎತ್ತರದಲ್ಲಿ ಈ ಡ್ರೋನ್‌ಗಳು ಕಾರ್ಯನಿರ್ವಹಿಸಬಹುದು ಎಂಬ ವಿಚಾರದಲ್ಲಿ ಕಠಿಣ ನಿಯಂತ್ರಣಗಳ ಅಗತ್ಯವಿದೆ. ಮುಖ್ಯವಾಗಿ, ಹಾರಾಟ ನಡೆಸಬಾರದ ವಲಯಗಳನ್ನು ಸ್ಪಷ್ಟವಾಗಿ ಗುರುತಿಸಬೇಕಿದೆ. ಪ್ರಮುಖ ಸಂಸ್ಥೆಗಳು, ಸೇನಾ ಪ್ರದೇಶಗಳು ಹಾಗೂ ಅಂತಹ ಮಹತ್ವದ ಜಾಗಗಳ 80-100 ಕಿ.ಮೀ ವ್ಯಾಪ್ತಿಯನ್ನು ಬಫರ್ ವಲಯಗಳೆಂದು ಗುರುತಿಸಬೇಕು ಎಂದು ಹೇಳಲಾಗಿದೆ.
ಜಮ್ಮುವಿನಲ್ಲಿ ಎರಡು ಡ್ರೋನ್ ದಾಳಿಗಳು ನಡೆದ ಬೆನ್ನಲ್ಲೇ ಮತ್ತಷ್ಟು ಡ್ರೋನ್ ಹಾರಾಟ ಪತ್ತೆಯಾಗಿದ್ದು, ಸೇನಾ ಪಡೆಗಳನ್ನು ಗುರಿಯನ್ನಾಗಿಸಿ ಉಗ್ರರಯ ಹಾಗೂ ಪಾಕಿಸ್ತಾನ ಪಡೆಗಳು ಡ್ರೋನ್ ಕಾರ್ಯಾಚರಣೆ ನಡೆಸುವುದರ ಅನುಮಾನವನ್ನು ದಟ್ಟವಾಗಿಸಿವೆ. (ಏಜೆನ್ಸೀಸ್, ಎಂ.ಎನ್)

Leave a Reply

comments

Related Articles

error: