ಕ್ರೀಡೆಪ್ರಮುಖ ಸುದ್ದಿ

ಟೋಕಿಯೊ ಒಲಿಂಪಿಕ್ಸ್: ಶೂಟಿಂಗ್ ಅರ್ಹತಾ ಸುತ್ತಿನಲ್ಲಿ 5ನೇ ಸ್ಥಾನ ಗಳಿಸಿದ ಮನು ಭಾಕರ್

ಟೋಕಿಯೊ,ಜು.29-ಟೋಕಿಯೂ ಒಲಿಂಪಿಕ್ಸ್ ಶೂಟಿಂಗ್ ವಿಭಾಗದ ಅರ್ಹತಾ ಸುತ್ತಿನಲ್ಲಿ 5ನೇ ಸ್ಥಾನ ಗಳಿಸಿರುವ ಭಾರತದ ಶೂಟರ್ ಮನು ಭಾಕರ್ ಭರವಸೆ ಮೂಡಿಸಿದ್ದಾರೆ.

ಇಂದು ನಡೆದ ಮಹಿಳೆಯರ 25 ಮೀಟರ್ ಪಿಸ್ತೂಲ್ ಪ್ರಿಸಿಷನ್ ಅರ್ಹತಾ ಸುತ್ತಿನಲ್ಲಿ 292 ಅಂಕ ಸಂಪಾದಿಸಿದ ಮನು ಭಾಕರ್ 5ನೇ ಸ್ಥಾನಗಳಿಸಿದರು.

ಇದೇ ಸ್ಪರ್ಧೆಯಲ್ಲಿ ಭಾಗವಹಿಸಿದ ರಾಹಿ ಸರ್ನೋಬತ್ 287 ಅಂಕಗಳೊಂದಿಗೆ 25ನೇ ಸ್ಥಾನಗಳಿಸಿ ನಿರಾಸೆ ಮೂಡಿಸಿದರು.

ಅಗ್ರ ಎಂಟು ಶೂಟರ್‌ಗಳು ಫೈನಲ್ಸ್‌ಗೆ ಅರ್ಹತೆಯನ್ನು ಪಡೆಯುತ್ತಾರೆ. ನಾಳೆ (ಶುಕ್ರವಾರ) ನಡೆಯಲಿರುವ ರ‍್ಯಾಪಿಡ್ ಫೈರ್ ಹಂತದ ಬಳಿಕ ಯಾರೆಲ್ಲ ಫೈನಲ್‌ಗೆ ಅರ್ಹತೆ ಗಿಟ್ಟಿಸಲಿದ್ದಾರೆ ಎಂಬುದರ ಬಗ್ಗೆ ಸ್ಪಷ್ಟ ಚಿತ್ರಣ ದೊರಕಲಿವೆ.

ಪ್ರಸ್ತುತ ಎಂಟನೇ ಸ್ಥಾನದಲ್ಲಿರುವ ಶೂಟರ್ 291 ಅಂಕಗಳನ್ನು ಹೊಂದಿದ್ದಾರೆ. ಹಾಗಾಗಿ ನಿಖರ ಗುರಿಯಿಡಲು ಯಶಸ್ವಿಯಾದ್ದಲ್ಲಿ ಮನು ಭಾಕರ್ ಫೈನಲ್‌ಗೇರುವುದರಲ್ಲಿ ಅನುಮಾನವೇ ಇಲ್ಲ.

ಜುಲೈ 25ರಂದು ನಡೆದ ಮಹಿಳೆಯರ 10 ಮೀಟರ್ ಏರ್ ಪಿಸ್ತೂಲ್ ಪದಕ ಸುತ್ತಿಗೆ ಅರ್ಹತೆ ಗಿಟ್ಟಿಸಿಕೊಳ್ಳುವಲ್ಲಿ ಮನು ಭಾಕರ್ ವಿಫಲರಾಗಿದ್ದರು. ಈಗ ಮಹಿಳೆಯರ 25 ಮೀಟರ್ ಪಿಸ್ತೂಲ್ ವಿಭಾಗದಲ್ಲಿ ಭರವಸೆ ಮೂಡಿಸಿದ್ದಾರೆ. (ಏಜೆನ್ಸೀಸ್, ಎಂ.ಎನ್)

Leave a Reply

comments

Related Articles

error: