ಕರ್ನಾಟಕಪ್ರಮುಖ ಸುದ್ದಿ

ಮಾಜಿ ಸಚಿವರ ಪುತ್ರ ಬಾಷಾ ಮನೆಯಲ್ಲಿ ಎನ್ಐಎಗೆ ಸಿಕ್ತು ಮಹತ್ವದ ದಾಖಲೆ

ಮಂಗಳೂರು,ಆ.5- ಮಾಜಿ ಶಾಸಕ ದಿ. ಬಿ. ಎಂ. ಇದಿನಬ್ಬ ಅವರ ಪುತ್ರ ಬಾಷಾ ಅವರ ಮನೆ ಮೇಲೆ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ಅಧಿಕಾರಿಗಳು ದಾಳಿಮಾಡಿದ ಸಂದರ್ಭದಲ್ಲಿ ಮಹತ್ವದ ದಾಖಲೆಗಳು ಸಿಕ್ಕಿದ್ದು, ಅದನ್ನು ವಶಪಡಿಸಿಕೊಳ್ಳಲಾಗಿದೆ. ಅಲ್ಲದೆ, ಬಾಷಾ ಅವನ್ನು ವಶಕ್ಕೆ ಪಡೆದಿದ್ದಾರೆ.

ಎನ್‌ಐಎ ಅಧಿಕಾರಿಗಳು ಬೆಳಗ್ಗಿನಿಂದ ಸಂಜೆಯವರೆಗೆ ಊಟ, ತಿಂಡಿ ಮಾಡದೆ ಮನೆಯಲ್ಲಿದ್ದವರನ್ನು ವಿಚಾರಣೆ ನಡೆಸಿ ದಾಖಲೆಗಳ ಶೋಧ ನಡೆಸಿ ಮಹತ್ವದ ದಾಖಲೆಗಳನ್ನು ವಶಪಡಿಸಿಕೊಂಡಿದ್ದಾರೆ. ಇವರಿಗೆ ಪೊಲೀಸರು ಸಾಥ್ ನೀಡಿದರು.

ಎನ್‌ಐಎ ಅಧಿಕಾರಿಗಳು ದಾಳಿ ಮಾಡುತ್ತಿದ್ದಂತೆ ಮನೆಯಲ್ಲಿದ್ದ ಶಂಕಿತ ಮಹಿಳೆ ಮೊಬೈಲ್‌ ಅಡಗಿಸಿಟ್ಟಿದ್ದಳು. ಎನ್‌ಐಎ ಅಧಿಕಾರಿಗಳು ಮೊಬೈಲ್‌ ಕೇಳಿದಾಗ ‘ನಾನು ದುಬೈನಲ್ಲೇ ಮರೆತು ಬಿಟ್ಟು ಬಂದಿದ್ದೇನೆ. ಮೊಬೈಲ್‌ ನನ್ನಲ್ಲಿಲ್ಲ’ ಎಂದು ಸಬೂಬು ನೀಡುತ್ತಿದ್ದಳು. ಹಠ ಬಿಡದ ಅಧಿಕಾರಿಗಳು ಮಹಿಳಾ ಪೊಲೀಸ್‌ ಸಿಬ್ಬಂದಿಯನ್ನು ಕರೆಯಿಸಿ ನಾನಾ ರೀತಿ ವಿಚಾರಣೆ ನಡೆಸಿ, ತಪಾಸಣೆ ನಡೆಸಿದಾಗ ಮೊಬೈಲ್‌ ಪತ್ತೆಯಾಗಿದೆ ಎಂದು ತಿಳಿದು ಬಂದಿದೆ.

ಉಳ್ಳಾಲದ ಕೆಲವು ಯುವಕರಿಗೆ ಹಿಂದಿನಿಂದಲೂ ಭಯೋತ್ಪಾದಕ ಸಂಘಟನೆ ಜತೆ ನಂಟು ಇರಬಹುದು ಎಂಬ ಕುರಿತು ಕೆಲವು ವರ್ಷ ಹಿಂದೆ ಚೆಂಬುಗುಡ್ಡೆಯಿಂದ ಪರಾರಿಯಾಗಿದ್ದ ಅಂತಾರಾಷ್ಟ್ರೀಯ ಭಯೋತ್ಪಾದಕ ರಿಯಾಜ್‌ ಭಟ್ಕಳ್‌ ಪ್ರಕರಣದ ವೇಳೆಯೂ ಅನುಮಾನ ವ್ಯಕ್ತವಾಗಿತ್ತು. ಇದೀಗ ಬಾಷಾ ಅವರ ಕುಟುಂಬದ ಮೇಲೆ ಶಂಕೆ ಇದ್ದು, ತನಿಖೆ ಮುಂದುವರಿದಿದೆ.

ಐಸಿಸಿ ನಂಟು: ಉದ್ಯಮಿ ಬಿ.ಎಂ. ಬಾಷಾ ಮಂಗಳೂರಿನಲ್ಲಿ ರಿಯಲ್‌ ಎಸ್ಟೇಟ್‌ ವ್ಯವಹಾರ ನಡೆಸುತ್ತಿದ್ದು, ಅವರ ಪುತ್ರ ಹಿಂದೆ ವಿದೇಶದಲ್ಲಿದ್ದು, ಈಗ ಊರಿನಲ್ಲಿ ಉದ್ಯಮ ನಡೆಸುತ್ತಿದ್ದಾರೆ. ಇದಿನಬ್ಬ ಅವರ ಮರಿ ಮೊಮ್ಮಗಳು(ಬಾಷಾರ ಮೊಮ್ಮಗಳು) ಈ ಹಿಂದೆ ಸಿರಿಯಾ ಉಗ್ರಗಾಮಿ ಸಂಘಟನೆ ಐಸಿಸ್‌ ಜತೆ ಲಿಂಕ್‌ ಹೊಂದಿದ್ದು, 2015ರಲ್ಲಿ ಕೇರಳದಿಂದ ನಾಪತ್ತೆಯಾಗಿದ್ದಳು. ಈ ಘಟನೆಯ ಬಳಿಕ ಎನ್‌ಐಎ ಟೀಮ್‌ ಈ ಕುಟಂಬದ ಮೇಲೆ ಕಣ್ಣಿಟ್ಟಿದ್ದು, ಮೊಬೈಲ್‌ ದಾಖಲೆಗಳನ್ನು ಟ್ರ್ಯಾಪ್‌ ಮಾಡಿತ್ತು. ಇದೇ ಆಧಾರದಲ್ಲಿಎನ್‌ಐಎ ದಾಳಿ ನಡೆಸಿರುವ ಸಾಧ್ಯತೆ ಇದೆ ಎಂದು ತಿಳಿದುಬಂದಿದೆ.

ಬಾಷಾ ಕುಟುಂಬದ ಕಿರಿಯ ಪುತ್ರ ಅನಾಸ್‌ ಹಾಗೂ ಆತನ ಪತ್ನಿ ಐಸಿಸ್‌ಗೆ ಸಂಬಂಧಿಸಿದ ಯೂಟ್ಯೂಬ್‌ ಚಾನೆಲ್‌ಗಳನ್ನು ಸಬ್‌ಸ್ಕೈಬ್ ಮಾಡಿದ್ದು ಎನ್‌ಐಎ ಕೆಂಗಣ್ಣಿಗೆ ಗುರಿಯಾಗಿದೆ. ಐಸಿಸ್‌ ಸಂಪರ್ಕ ಮತ್ತು ಜಮ್ಮು ಕಾಶ್ಮೀರದ ಉಗ್ರ ಸಂಘಟನೆಯ ಯುವಕರ ಜತೆ ಮೊಬೈಲ್‌ ಮೂಲಕ ಸಂಪರ್ಕವಿರುವ ಬಗ್ಗೆ ಮಾಹಿತಿ ಹಿನ್ನೆಲೆಯಲ್ಲಿ ತಂತ್ರಾಂಶ ಸಮೇತ ದಾಳಿ ನಡೆಸಲಾಗಿದೆ.

ಬಿ. ಎಂ. ಬಾಷಾ ಹಲವು ಧಾರ್ಮಿಕ ಕೇಂದ್ರ, ಶಿಕ್ಷಣ ಸಂಸ್ಥೆಯ ಅಧ್ಯಕ್ಷರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಮಗ ಅನಾಸ್‌ನ ಪತ್ನಿ ಮಕ್ಕಳಿಗೆ ತರಗತಿ ನಡೆಸಿಕೊಡುತ್ತಿದ್ದಳು. ಬಾಷಾ ಅವರ ಹಿರಿಯ ಪುತ್ರ ಅಮೀರ್‌ ಅಮೆರಿಕದಿಂದ ಬಂದ ಬಳಿಕ ಆಶ್ರಮ ನಿರ್ಮಿಸಲು ಉದ್ದೇಶಿಸಿದ್ದರಾದರೂ ಆಸ್ತಿ ವಿವಾದದಿಂದ ಅಪ್ಪನ ವಿರುದ್ಧವೇ ಪೊಲೀಸ್‌ ದೂರು ನೀಡಿದ್ದರು. ಒಂದು ಹಂತದಲ್ಲಿ ಐಸಿಎಸ್‌ ನಂಟು ಕುರಿತು ಪೊಲೀಸರಿಗೆ ಮಾಹಿತಿ ಸಿಗಲು ಮನೆಮಂದಿಯ ಈ ಆಸ್ತಿ ವಿವಾದವೇ ಪರೋಕ್ಷವಾಗಿ ಕಾರಣವಾಗಿದೆ ಎನ್ನಲಾಗಿದೆ.

ಬಾಷಾ ಅವರ ಎರಡನೇ ಪುತ್ರ ಅನಾಸ್‌ನ ಪತ್ನಿ ಕೊಡಗು ಮೂಲದ ದೀಪ್ತಿ ಮಾರ್ಲ. ಈಕೆ ಮತಾಂತರಗೊಂಡು ಈಗ ಮರಿಯಮ್ಮ ಹೆಸರಿನಲ್ಲಿ ಐಸಿಸ್‌ ಜತೆ ನಂಟು ಹೊಂದಿದ್ದರು. ಇದು ಲವ್‌ ಜಿಹಾದ್‌ ಶಂಕೆ ಮೂಡಿಸಿದೆ. ಈಕೆ ಮಾವ ಬಿ.ಎಂ. ಬಾಷಾ ಅವರ ಅಧಿಕಾರದಲ್ಲಿರುವ ಕೆಲವು ಶಿಕ್ಷಣ ಸಂಸ್ಥೆಗಳಲ್ಲಿ ವಿದ್ಯಾರ್ಥಿಗಳಿಗೆ ಸಂಪನ್ಮೂಲ ವ್ಯಕ್ತಿಯಾಗಿ ತರಬೇತಿ ನೀಡುತ್ತಿದ್ದರು.

ಬಿ.ಎಂ. ಇದಿನಬ್ಬ ವರ ಮರಿ ಮೊಮ್ಮಗಳು ಐಸಿಸ್‌ ಜತೆ ನಂಟು ಹೊಂದಿರುವ ಮಾಹಿತಿ ಸಿಗುತ್ತಿದ್ದಂತೆ ಇದನ್ನು ಐಎಸ್‌ಡಿ(ಇಂಟರ್‌ನ್ಯಾಷನಲ್‌ ಸೆಕ್ಯುರಿಟಿ ಆ್ಯಂಡ್‌ ಡಿಫೆನ್ಸ್‌) ತಂಡ ವಿಶೇಷ ನಿಗಾ ಇರಿಸಿತ್ತು. ಹಲವು ಸಮಯದಿಂದ ಇಡೀ ಕುಟುಂಬದ ಮೊಬೈಲ್‌ ನೆಟ್‌ವರ್ಕ್, ಅಂತರ್ಜಾಲದ ಬಗ್ಗೆ ನಿಗಾ ಇರಿಸಿತ್ತು. ಈ ಬಗ್ಗೆ ಸಮರ್ಪಕ ದಾಖಲೆ ಸಿಗುತ್ತಿದ್ದಂತೆ ಎನ್‌ಐಎ ದಾಳಿ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ. (ಎಂ.ಎನ್)

Leave a Reply

comments

Related Articles

error: