ದೇಶಪ್ರಮುಖ ಸುದ್ದಿ

ಐಟಿಬಿಪಿಗೆ ಮೊದಲ ಮಹಿಳಾ ಅಧಿಕಾರಿಗಳ ಸೇರ್ಪಡೆ: ಹೊಸ ಸಂಪ್ರದಾಯಕ್ಕೆ ನಾಂದಿ!

ಡೆಹ್ರಾಡೂನ್‌,ಆ.9-ಭಾರತ-ಚೀನಾ ಗಡಿ ಕಾಯುವ ಹೊಣೆಯುಳ್ಳ ‘ಇಂಡೋ- ಟಿಬೆಟಿಯನ್‌ ಗಡಿ ಪೊಲೀಸ್‌ ಪಡೆ’ಗೆ (ಐಟಿಬಿಪಿ) ಈಗ ನಾರಿ ಶಕ್ತಿ ಕಾಲಿಟ್ಟಿದೆ. ಐಟಿಬಿಪಿ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಯುದ್ಧಭೂಮಿಯಲ್ಲಿ ಕರ್ತವ್ಯ ನಿರ್ವಹಿಸಲು ಮಹಿಳಾ ಅಧಿಕಾರಿಗಳನ್ನು ನೇಮಿಸಲಾಗಿದೆ. ಆ ಮೂಲಕ ಅರೆಸೇನಾ ಪಡೆಯು ಹೊಸ ಸಾಂಪ್ರದಾಯಕ್ಕೆ ನಾಂದಿ ಹಾಡಿದೆ.

ಉತ್ತರಾಖಂಡದ ಮಸ್ಸೂರಿಯ ತರಬೇತಿ ಅಕಾಡೆಮಿಯಲ್ಲಿ ಯಶಸ್ವಿಯಾಗಿ ತರಬೇತಿ ಮುಗಿಸಿದ ಪ್ರಕೃತಿ ಹಾಗೂ ದೀಕ್ಷಾ ಈಗ ಅಸಿಸ್ಟಂಟ್‌ ಕಮಾಂಡೆಂಟ್‌ ಹುದ್ದೆಯೊಂದಿಗೆ ದೇಶದ ಗಮನ ಸೆಳೆದಿರುವುದಲ್ಲದೆ, ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.

ನಿನ್ನೆ ನಡೆದ ಮಹಿಳಾ ಅಧಿಕಾರಿಗಳ ಸೇರ್ಪಡೆ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ಮುಖ್ಯಮಂತ್ರಿ ಪುಷ್ಕರ್‌ ಸಿಂಗ್‌ ಧಾಮಿ, ಮಹಿಳಾ ಅಧಿಕಾರಿಗಳಿಗೆ ಅಭಿನಂದನೆಗಳು. ಯಾರಿಗೂ ಕಡಿಮೆ ಇಲ್ಲ ಎಂಬಂತೆ ನೀವು ಸೇವೆ ಸಲ್ಲಿಸಬೇಕು. ನಾನು ಸಹ ಯೋಧನ ಮಗನಾಗಿದ್ದು, ಸೇನೆ ಕುರಿತು ನನಗೆ ಚೆನ್ನಾಗಿ ಗೊತ್ತು. ದೇಶ ಇಂದು ಸುರಕ್ಷಿತವಾಗಿದ್ದರೆ ಅದಕ್ಕೆ ಯೋಧರ ತ್ಯಾಗ, ಶೌರ್ಯ, ಬಲಿದಾನವೇ ಕಾರಣ ಎಂದು ಹೇಳಿದರು.

ಐಟಿಬಿಪಿ ತರಬೇತಿಯಲ್ಲಿ 53 ಅಧಿಕಾರಿಗಳು ಉತ್ತೀರ್ಣರಾಗಿದ್ದು, 42 ಅಧಿಕಾರಿಗಳು ಕಾಂಬ್ಯಾಟ್‌ ಕೇಡರ್‌ನಲ್ಲಿದ್ದರೆ, 11  ಅಧಿಕಾರಿಗಳು ಎಂಜಿನಿಯರಿಂಗ್‌ ಕೇಡರ್‌ನಲ್ಲಿದ್ದಾರೆ. ಈ ಅಧಿಕಾರಿಗಳನ್ನು ಭಾರತ-ಚೀನಾ ನಡುವಿನ ವಾಸ್ತವಿಕ ನಿಯಂತ್ರಣ ರೇಖೆ(ಎಲ್‌ಎಸಿ), ನಕ್ಸಲ್‌ ನಿಗ್ರಹ ಕಾರ್ಯಾಚರಣೆಯಲ್ಲಿ ಬಳಸಿಕೊಳ್ಳಲಾಗುವುದು. ಐಟಿಬಿಪಿಯು 2016 ರಿಂದ ಮಹಿಳಾ ಅಧಿಕಾರಿಗಳನ್ನು ನೇಮಿಸುವ ಪ್ರಕ್ರಿಯೆಗೆ ಚಾಲನೆ ನೀಡಿದ್ದು, ಲೋಕಸೇವಾ ಆಯೋಗ (ಯುಪಿಎಸ್‌ಸಿ) ದೇಶಾದ್ಯಂತ ನಡೆಸುವ ಪರೀಕ್ಷೆ ಮೂಲಕ ಇವರನ್ನು ಆಯ್ಕೆ ಮಾಡುತ್ತದೆ. ತರಬೇತಿ ಬಳಿಕ ಸೇವೆಗೆ ಸೇರ್ಪಡೆ ಮಾಡಿಕೊಳ್ಳಲಾಗುತ್ತದೆ. (ಏಜೆನ್ಸೀಸ್, ಎಂ.ಎನ್)

Leave a Reply

comments

Related Articles

error: