ದೇಶಪ್ರಮುಖ ಸುದ್ದಿ

ನ್ಯಾಷನಲ್‌ ಮಾನಿಟೈಸೇಶನ್‌ ಪೈಪ್‌ಲೈನ್‌ ಯೋಜನೆ ಘೋಷಿಸಿದ ಸಚಿವೆ ನಿರ್ಮಲಾ ಸೀತಾರಾಮನ್

ನವದೆಹಲಿ,ಆ.24- ನ್ಯಾಷನಲ್‌ ಮಾನಿಟೈಸೇಶನ್‌ ಪೈಪ್‌ಲೈನ್‌ (ಎನ್‌ಎಂಪಿ) ಯೋಜನೆಯನ್ನು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ನಿನ್ನೆ ಘೋಷಿಸಿದ್ದಾರೆ.

ರೈಲ್ವೆ, ರಸ್ತೆ, ವಿದ್ಯುತ್‌ ವಲಯದಲ್ಲಿ ಬಳಕೆಯಾಗದಿರುವ ಸಾರ್ವಜನಿಕ ಆಸ್ತಿಗಳಲ್ಲಿ ಖಾಸಗಿ ಹೂಡಿಕೆಗೆ ಅವಕಾಶ ಕಲ್ಪಿಸಿ ನಗದೀಕರಿಸುವ 6 ಲಕ್ಷ ಕೋಟಿ ರೂ.ಗಳ ಯೋಜನೆ ಇದಾಗಿದೆ.

`ಇದು ಸರ್ಕಾರಿ ಆಸ್ತಿಗಳ ಮಾರಾಟ ಯೋಜನೆ ಅಲ್ಲ. ಸರಕಾರ ತನ್ನ ಆಸ್ತಿಯನ್ನು ಮಾರಾಟ ಮಾಡುವುದಿಲ್ಲ. ಆಸ್ತಿಯ ಮಾಲಿಕತ್ವ ಸರ್ಕಾರದ ಬಳಿಯೇ ಇರಲಿದೆ’ ಎಂದು ನಿರ್ಮಲಾ ಸೀತಾರಾಮನ್‌ ಸ್ಪಷ್ಟಪಡಿಸಿದ್ದಾರೆ.

ಪ್ರಯಾಣಿಕರ ರೈಲ್ವೆ, ರೈಲ್ವೆ ನಿಲ್ದಾಣ, ಏರ್‌ಪೋರ್ಟ್‌, ರಸ್ತೆ, ಸ್ಟೇಡಿಯಂ ವಲಯದಲ್ಲಿ ಖಾಸಗಿ ಕಂಪನಿಗಳನ್ನು ಬಳಸಿಕೊಂಡು, ಸಾರ್ವಜನಿಕ ಆಸ್ತಿಯ ಮೌಲ್ಯವನ್ನು ವೃದ್ಧಿಸಲಾಗುವುದು, ಪೂರ್ಣ ಪ್ರಮಾಣದಲ್ಲಿ ಬಳಸಿಕೊಳ್ಳಲಾಗುವುದು. ಇದರಿಂದ ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದಲ್ಲಿ ಮೂಲಸೌಕರ್ಯ ವಲಯದ ಪ್ರಗತಿಗೆ ಅವಶ್ಯವಿರುವ ಬಂಡವಾಳ ದೊರೆಯಲಿದೆ ಎಂದು ತಿಳಿಸಿದ್ದಾರೆ.

ಚೆನ್ನೈ, ಭೋಪಾಲ, ವಾರಾಣಸಿ, ವಡೋದರಾ ಸೇರಿದಂತೆ 25 ವಿಮಾನ ನಿಲ್ದಾಣಗಳು, 400 ರೈಲ್ವೆ ನಿಲ್ದಾಣಗಳು, 741 ಕಿ.ಮೀಗಳ ಕೊಂಕಣ ರೈಲ್ವೆ, 26,700 ಕಿ.ಮೀ ಹೆದ್ದಾರಿ, ಹೊಸ ರಸ್ತೆಗಳು, 40 ರೈಲ್ವೆ ಸ್ಟೇಡಿಯಂಗಳು, ರೈಲ್ವೆ ಕಾಲೊನಿಗಳಲ್ಲಿ ಖಾಸಗಿ ಕಂಪನಿಗಳಿಗೆ ಹೂಡಿಕೆಗೆ ಅವಕಾಶ ಸಿಗಲಿದೆ. ಗುರುತಿಸಿರುವ ಅರ್ಧದಷ್ಟು ಆಸ್ತಿಗಳು ರಸ್ತೆ, ರೈಲ್ವೆ ವಿಭಾಗದಲ್ಲಿವೆ.

ಏನಿದು ಯೋಜನೆ?

ಈ ಎನ್‌ಎಂಪಿ ಯೋಜನೆಯಡಿಯಲ್ಲಿ ಖಾಸಗಿ ಕಂಪನಿಗಳು ನಿರ್ದಿಷ್ಟ ಸಾರ್ವಜನಿಕ ಆಸ್ತಿಗಳಲ್ಲಿ ಬಂಡವಾಳ ಹೂಡಿಕೆ ಮಾಡಿ ಅಭಿವೃದ್ಧಿಪಡಿಸಲಿವೆ. ಪ್ರತಿಯಾಗಿ ನಿಶ್ಚಿತ ಅವಧಿಗೆ ಆದಾಯ ಪಡೆಯಲಿವೆ. ನಂತರ ಸರ್ಕಾರಕ್ಕೆ ಆಸ್ತಿಯನ್ನು ಹಿಂತಿರುಗಿಸಬೇಕಾಗುತ್ತದೆ. ಗೋದಾಮು, ಸ್ಟೇಡಿಯಂನಂಥ ಆಸ್ತಿಯನ್ನು ದೀರ್ಘಕಾಲೀನ ಅವಧಿಗೆ ಲೀಸ್‌ಗೆ ನೀಡುವ ಸಾಧ್ಯತೆ ಇದೆ. ಯೋಜನೆಯ ಅವಧಿ 4 ವರ್ಷಗಳು. (ಏಜೆನ್ಸೀಸ್, ಎಂ.ಎನ್)

Leave a Reply

comments

Related Articles

error: